پاکستان اور برطانیہ نے پولیس کی تربیت، حوالگی، امیگریشن اور انسانی اسمگلنگ کی روک تھام کے شعبوں میں تعاون بڑھانے پر اتفاق کیا ہے۔ یہ سمجھوتہ آج اسلام آباد میں وزیر داخلہ محسن نقوی اور برطانوی نیشنل کرائم ایجنسی کے ڈائریکٹر جنرل گریم بگگر کے درمیان ہونے والی ملاقات میں طے پایا۔
ملاقات میں حوالگی اور دیگر شعبوں میں تعاون کے لیے پانچ مفاہمت کی یادداشتوں کو جلد حتمی شکل دینے پر بھی اتفاق کیا گیا۔ دونوں فریقین نے انسداد منشیات فورس اور نیشنل سائبر کرائم انویسٹی گیشن ایجنسی سمیت مختلف ایجنسیوں کے افسران کے تربیتی کورسز میں باہمی تعاون بڑھانے پر بھی اتفاق کیا۔ انہوں نے بچوں کو آن لائن ہراساں کرنے سے نمٹنے کے لیے موثر رابطہ کاری پر بھی اتفاق کیا۔ ڈی جی برٹش نیشنل کرائم ایجنسی نے اسلام آباد میں حالیہ خودکش حملے کی مذمت کرتے ہوئے قیمتی جانوں کے ضیاع پر دکھ کا اظہار کیا۔
انہوں نے پاکستان کی نارکوٹکس کنٹرول کی کوششوں کو سراہا اور کہا کہ برطانیہ مختلف شعبوں میں حکومت پاکستان کے ساتھ تعاون کر رہا ہے۔اس موقع پر خطاب کرتے ہوئے وزیر داخلہ محسن نقوی نے کہا کہ پاکستان پوری دنیا میں دہشت گردی کے خلاف ثابت قدمی کا مظہر ہے۔ انہوں نے کہا کہ جدید تربیت اور فرانزک قانون نافذ کرنے والے اداروں کی صلاحیتوں میں مزید اضافہ کر سکتے ہیں۔
