پاکستان
اور چین نے جدید ٹیکنالوجی کے ذریعے پاکستان کی کپاس کی پیداوار بڑھانے کے لیے
تعاون کے لیے مفاہمت کی یادداشت پر دستخط کیے ہیں۔ ایوب ایگریکلچرل ریسرچ انسٹی
ٹیوٹ آف پاکستان اور چائنیز اکیڈمی آف ایگریکلچرل سائنسز کے انسٹی ٹیوٹ آف کاٹن
ریسرچ کے درمیان مفاہمت کی یادداشت پر دستخط کیے گئے ہیں۔
معاہدے کے
تحت ایوب زرعی تحقیقاتی ادارہ اور آئی سی آر کپاس کی جینیاتی بہتری پر کام کریں گے
تاکہ اس کی پیداوار میں اضافہ ہو اور عالمی سطح پر پاکستان کی کپاس کی صنعت کو
فروغ دیا جا سکے۔
وزیراعظم
محمد شہبازشریف نے پاکستان اسٹاک ایکسچینج کے ایک لاکھ 20 ہزار پوائنٹس کی نئی
بلند ترین سطح عبور کرنے پر اطمینان کا اظہار کیا ہے۔ ایک بیان میں،
انہوں نے کہا کہ اسٹاک مارکیٹ میں مثبت رجحان حکومت کی اقتصادی پالیسیوں پر تاجروں
اور سرمایہ کاروں کے بڑھتے ہوئے اعتماد کی عکاسی کرتا ہے۔
شہباز شریف نے کہا کہ بجلی کے نرخوں میں نمایاں
کمی کی گئی ہے جس سے نہ صرف گھریلو صارفین کو ریلیف ملے گا بلکہ یہ کاروباری
برادری اور صنعتوں کے لیے خوش آئند پیش رفت ہو گی۔ وزیراعظم نے کہا کہ معاشی
اشاریوں اور کاروباری ماحول میں گزشتہ سال کے دوران بہتری حکومت کی معاشی پالیسیوں
کی وجہ سے ممکن ہوئی ہے۔
انہوں نے کہا کہ حکومت ملک میں کاروبار اور
سرمایہ کاری کے لیے سازگار ماحول فراہم کرنے کے لیے ترجیحی بنیادوں پر سہولیات
فراہم کر رہی ہے۔
