وزیر اعظم شہباز شریف نے کینیڈا میں متحرک پاکستانیوں کے گراں قدر تعاون کو سراہا ہے جو دونوں ممالک کے درمیان ایک اہم پل کا کام کر رہا ہے۔ وہ پاکستان میں کینیڈا کے نئے تعینات ہونے والے ہائی کمشنر سفیر طارق علی خان سے گفتگو کر رہے تھے جنہوں نے آج اسلام آباد میں وزیراعظم سے ملاقات کی۔ ملاقات میں وزیراعظم کے معاون خصوصی برائے خارجہ امور طارق فاطمی اور سیکرٹری خارجہ آمنہ بلوچ بھی موجود تھیں۔
وزیراعظم نے ہائی کمشنر کو ان کی تقرری پر مبارکباد پیش کی اور اس اعتماد کا اظہار کیا کہ ان کے دور سے پاکستان اور کینیڈا کے درمیان دیرینہ اور دوستانہ تعلقات مزید مستحکم ہوں گے۔ شہباز شریف نے کینیڈین قیادت کو مبارکباد پیش کرتے ہوئے کہا کہ وہ دونوں ممالک کے درمیان مضبوط تعلقات استوار کرنے کے لیے ان کے ساتھ مل کر کام کرنے کے منتظر ہیں۔ وزیراعظم نے کانوں اور معدنیات کو باہمی دلچسپی کے ایک اہم شعبے کے طور پر اجاگر کیا، اور کہا کہ ریکوڈک منصوبے میں بیرک گولڈ کا کردار پاکستان میں ترقی کا محور اور پاکستان اور کینیڈا اقتصادی تعاون کی کامیابی کی داستان ثابت ہوگا۔ اپنے ریمارکس میں کینیڈین ہائی کمشنر نے پرتپاک استقبال پر وزیراعظم شہباز شریف کا شکریہ ادا کیا۔ انہوں نے پاکستان اور کینیڈا کے باہمی تعلقات بالخصوص زراعت، توانائی، تجارت، سرمایہ کاری، ٹیکنالوجی، تعلیم اور عوام سے عوام کے تبادلوں میں مزید فروغ کے لیے کام کرنے کے عزم کا اظہار کیا۔
