پنجاب حکومت نے مسافروں کی سہولت کے لیے انیس اضلاع میں تقریباً چودہ سو بس شیلٹرز قائم کرنے کا فیصلہ کیا ہے۔ یہ فیصلہ آج لاہور میں وزیراعلیٰ (Chief Minister)پنجاب مریم نواز کی زیر صدارت اجلاس میں کیا گیا۔ اجلاس سے خطاب کرتے ہوئے انہوں نے کہا کہ خوبصورت اور جدید بس شیلٹرز مسافروں کو سہولت فراہم کریں گے اور شہروں کی خوبصورتی میں اضافہ کریں گے۔
پنجاب حکومت نے شہری مراکز میں جدید سالڈ ویسٹ مینجمنٹ سسٹم متعارف کرانے کا فیصلہ کیا ہے۔ منصوبے کے تحت ٹھوس کچرے کو جمع کرنے کے لیے مخصوص رنگوں کی عکاسی کرنے والے کچرے کے ڈبے لگائے جائیں گے۔ کاغذ اور پیکنگ کا سامان پیلے رنگ کے کچرے کے ڈبوں میں ڈالا جائے گا جبکہ سبز کچرے کے ڈبے شیشے کی بوتلوں اور شیشے کے ٹکڑوں کے لیے استعمال کیے جائیں گے۔ پھلوں، سبزیوں، کھانوں اور اشیائے خوردونوش کے بوسیدہ مواد کو اکٹھا کرنے کے لیے سرمئی رنگ کے کچرے کے ڈبے لگائے جائیں گے۔ پلاسٹک کے کچرے کو جمع کرنے کے لیے نارنجی رنگ کے کچرے کے ڈبے استعمال کیے جائیں گے۔
وزیراعلیٰ(Chief Minister) سندھ سید مراد علی شاہ نے صحت سے متعلق ترقیاتی منصوبوں پر کام تیز کرنے کی ہدایت کی ہے۔ آج کراچی میں منصوبوں پر پیش رفت کا جائزہ لینے کے لیے ایک اجلاس کی صدارت کرتے ہوئے انہوں نے کہا کہ رواں مالی سال میں سولہ نئے منصوبے شروع کیے گئے ہیں۔ اجلاس کو بتایا گیا کہ محکمہ صحت کے 178 منصوبے سالانہ ترقیاتی پروگرام میں شامل ہیں۔
