وزیر
دفاع خواجہ آصف نے کہا ہے کہ ملک کی مسلح افواج بھارتی جارحیت سے پیدا ہونے والی
صورتحال سے نمٹنے کے لیے پوری طرح تیار ہیں۔
آج
قومی اسمبلی میں اظہار خیال کرتے ہوئے انہوں نے کہا کہ ہماری افواج لائن آف کنٹرول
اور ورکنگ باؤنڈری پر دشمن قوتوں کا بہادری سے مقابلہ کر رہی ہیں۔ انہوں نے کہا کہ بھارت کے عزائم کو کامیابی سے
ناکام بنا دیا گیا جس سے ان کے عوام، میڈیا اور سیاسی جماعتوں کے حوصلے پست ہو گئے
ہیں۔ انہوں نے کہا کہ ہمارے عوام، مسلح افواج، سیاسی جماعتوں اور معاشرے کے دیگر
طبقات کے حوصلے بلند ہیں۔پانچ بھارتی لڑاکا طیاروں کے ساتھ ساتھ ڈرون کو مار گرانے
کا ذکر کرتے ہوئے انہوں نے کہا کہ ہمیں اپنی مسلح افواج پر فخر ہے اور پوری قوم ان
کے ساتھ کندھے سے کندھا ملا کر کھڑی ہے۔
سفارتی محاذ پر خواجہ آصف نے کہا کہ حکومت عالمی
برادری سے قریبی رابطے برقرار رکھے ہوئے ہے۔ انہوں نے کہا کہ ہم چین اور خلیجی
ممالک سے روزانہ کی بنیاد پر رابطے میں ہیں۔ انہوں نے کہا کہ دوست ممالک نے بھی
پاکستان کی حمایت کا اظہار کیا ہے۔ انہوں نے کہا کہ اقوام متحدہ میں ہمارا مشن
پاکستان کا نقطہ نظر موثر انداز میں پیش کر رہا ہے۔ انہوں نے کہا کہ کوئی بھی ملک
بھارت کے ساتھ کھڑا نہیں ہے۔
قبل ازیں بحث میں حصہ لیتے ہوئے جے یو آئی (ف)
کے سربراہ مولانا فضل الرحمان نے کہا کہ بھارت نے مساجد اور مدارس کو نشانہ بنایا
جس کے نتیجے میں شہریوں کی جانیں ضائع ہوئیں۔ انہوں نے بھارتی جارحیت پر مسلح
افواج کی بہادری اور موثر جواب کو سراہا۔ انہوں نے کہا کہ ان کی جماعت بھارتی جارحیت
کی مذمت کے لیے آج یوم دفاع وطن منا رہی ہے۔
نیشنل فوڈ سیکیورٹی کے وزیر رانا تنویر حسین نے
کہا کہ ہماری مسلح افواج نے ہمیشہ پاکستان کے خلاف بھارت کے مذموم عزائم کو ناکام
بنایا ہے۔ انہوں نے کہا کہ ہماری افواج دنیا میں بہترین ہیں اور دشمن بھی ہماری
صلاحیتوں سے واقف ہے۔
مصباح الدین نے کہا کہ جنگ کسی مسئلے کا حل نہیں
ہے۔ تاہم انہوں نے کہا کہ اگر دشمن کی طرف سے جنگ مسلط کی گئی تو ہماری مسلح افواج
پوری قوم کی حمایت سے ملک کی خود مختاری اور علاقائی سالمیت کا دفاع کرنے کی پوری
صلاحیت رکھتی ہیں۔ حاجی رسول بخش چانڈیو نے کہا کہ کسی کو پاکستان پر میلی آنکھ سے
دیکھنے کی اجازت نہیں دی جائے گی۔
