اشیائے خوردونوش کی قیمتوں کو کنٹرول کرنے کے لیے کمیٹی بنانے کی ہدایت

صدر آصف علی زرداری نے رمضان المبارک کی آمد پر پوری پاکستانی قوم اور دنیا بھر کے مسلمانوں کو مبارکباد دی ہے۔

اپنے پیغام میں انہوں نے کہا کہ رمضان المبارک ہمیں اللہ تعالیٰ کی اطاعت اور بندگی کے لیے وقف کر کے ایک مثالی مسلمان بننے کا سنہری موقع فراہم کرتا ہے۔

 

آصف علی زرداری نے مخیر حضرات پر زور دیا کہ وہ زکوٰۃ ادا کریں اور ضرورت مندوں اور بے سہارا لوگوں کی مدد کے لیے اس رمضان میں زیادہ سے زیادہ خیرات کریں۔

اس کے علاوہ صدر نے عالمی برادری اور امت مسلمہ سے بھی مظلوم فلسطینیوں کی مدد کرنے کی اپیل کی۔ انہوں نے غزہ میں فوری جنگ بندی اور بے گناہ فلسطینیوں کی نسل کشی روکنے کے لیے عملی اقدامات کرنے کا مطالبہ کیا۔

 

جبکہ وزیراعظم نے اشیائے خوردونوش کی قیمتوں کو کنٹرول کرنے کے لیے کمیٹی بنانے کی ہدایت کردی

وزیر اعظم شہباز شریف نے ملک میں اشیائے ضروریہ کی قیمتوں کو کنٹرول کرنے کے لیے فوری طور پر کمیٹی بنانے کی ہدایت کی ہے۔

انہوں نے یہ ہدایات آج اسلام آباد میں وفاقی کابینہ کے افتتاحی اجلاس کی صدارت کرتے ہوئے دیں۔

 

وزیراعظم نے حکم دیا کہ کمیٹی صوبائی حکومتوں کے ساتھ مل کر اشیائے ضروریہ کی قیمتوں کی کڑی نگرانی کرے گی۔

وزیراعظم نے اس بات پر زور دیا کہ اشیائے ضروریہ کی قیمتوں میں بلا جواز اضافہ اور منافع خوری کے خلاف سخت کارروائی کی جائے گی۔ انہوں نے کہا کہ اس سلسلے میں کسی قسم کی کوتاہی برداشت نہیں کی جائے گی۔

 

شہباز شریف نے کہا کہ حکومت نے رمضان ریلیف پیکج کا حجم ساڑھے سات ارب سے بڑھا کر ساڑھے بارہ ارب روپے کر دیا۔ انہوں نے مزید کہا کہ لوگوں کی سہولت کے لیے موبائل یوٹیلیٹی اسٹورز کو بھی فعال کیا جائے گا۔

وزیراعظم نے کہا کہ بے نظیر انکم سپورٹ پروگرام کے تحت معاشرے کے غریب طبقات میں اضافی فنڈز تقسیم کیے جائیں گے۔ انہوں نے کہا کہ حکومت شفافیت کو یقینی بنانے کے لیے بی آئی ایس پی کے تحت فنڈز کی تقسیم کی مکمل نگرانی کرے گی۔

 

وزارت تجارت کی سفارش کے جواب میں وفاقی کابینہ نے پیاز اور کیلے کی برآمد پر اگلے ماہ کی 15 تاریخ تک پابندی کی منظوری دے دی۔

اس اقدام کا مقصد رمضان کے بابرکت مہینے کے دوران مارکیٹ میں وافر مقدار میں دستیابی کو یقینی بنانا ہے۔

مزید برآں، وفاقی کابینہ نے وزارت داخلہ کی سفارش پر ہالینڈ میں مقیم ڈچ شہری جناب محمد اورنگزیب کی پاکستانی شہریت کی بحالی کی منظوری دی۔

 

وزارت نارکوٹکس کنٹرول کی تجویز کے مطابق میجر جنرل عبدالمعید ہلال امتیاز ملٹری کو انسداد منشیات فورس کا ڈائریکٹر جنرل مقرر کیا گیا ہے۔

قبل ازیں وزیراعظم نے کابینہ کے نئے ارکان کو مبارکباد دی اور ان کی مدت ملازمت کے لیے نیک خواہشات کا اظہار کیا۔ انہوں نے کابینہ کے اجلاس کے دوران حکومت کے وژن اور ترجیحات کا خاکہ بھی پیش کیا