بروقت انتخابات سے ملک کی سیاسی، معاشی صورتحال بہتر ہو گی
بروقت انتخابات سے ملک کی سیاسی، معاشی صورتحال بہتر ہو گی۔ صدر مملکت ڈاکٹر عارف علوی
صدر مملکت ڈاکٹر عارف علوی
نے کہا ہے کہ انتخابات میں کوئی تاخیر نہیں ہوگی اور بروقت انتخابات سے ملک کی سیاسی
اور معاشی صورتحال میں بہتری کی راہ ہموار ہوگی۔
وہ منگل کو اسلام آباد میں
کونسل آف پاکستان نیوز پیپرز ایڈیٹرز کے صدر کاظم خان کی قیادت میں ایک وفد سے گفتگو
کر رہے تھے۔
صدر مملکت نے پاکستان کے آئین
کو برقرار رکھنے کی ضرورت پر بھی زور دیا کیونکہ ہماری تاریخ نے ثابت کیا ہے کہ انتخابات
میں تاخیر جمہوریت کو نقصان پہنچاتی ہے۔
انہوں نے کہا کہ وہ اختلافات
کو کم کرنے اور سیاسی جماعتوں میں مفاہمت کو فروغ دینے کے لیے اپنا کردار ادا کر رہے
ہیں۔ انہوں نے کہا کہ وہ ملک کی خاطر کسی بھی شخص یا سیاسی جماعت سے ملنے کو تیار ہیں۔
انہوں نے ریمارکس دیئے کہ انہوں نے پی ٹی آئی کی قیادت کو دیگر سیاسی جماعتوں سے بھی
مذاکرات کرنے کا کہا ہے۔
ملک کی موجودہ معاشی صورتحال
کے بارے میں بات کرتے ہوئے صدر نے کہا کہ ان کی پختہ رائے ہے کہ پاکستان ڈیفالٹ نہیں
کرے گا، انہوں نے مزید کہا کہ بہتر اور موثر مالیاتی انتظام ملک کو درپیش معاشی مشکلات
پر قابو پانے میں مدد دے سکتا ہے۔
