صدر آصف علی زرداری نے اس اعتماد کا اظہار کیا ہے کہ پاکستان اور جاپان(Japan) کے درمیان تعلقات ایک واضح مقصد اور مشترکہ عزائم کے ساتھ مزید مضبوط ہوتے رہیں گے۔ ان خیالات کا اظہار انہوں نے جاپانی شہنشاہ ناروہیٹو کی 66ویں سالگرہ کے سلسلے میں اسلام آباد میں ایک تقریب کے دوران کیا۔ صدر مملکت نے کہا کہ 80 سے زائد جاپانی کمپنیاں پاکستان میں سرگرم ہیں جو روزگار کے مواقع پیدا کرنے، معیشت کو مضبوط بنانے اور قابل قدر مہارت کا اشتراک کرنے میں اہم کردار ادا کر رہی ہیں۔ ان کا مزید کہنا تھا کہ ان کی موجودگی پاکستان کی صلاحیت پر ان کے اعتماد کی عکاسی کرتی ہے۔ انہوں نے کہا کہ پاکستان جاپان(Japan) کو تکنیکی مہارت اور جدت کے نمونے کے طور پر دیکھتا ہے اور اس کے تجربے سے سیکھنے کی کوشش کرتا ہے تاکہ وہ ہنر کی تعمیر، اداروں کو مضبوط کرنے اور اپنے نوجوانوں کو مستقبل کے لیے تیار کرے۔ آصف علی زرداری نے کہا کہ جاپان نے موسمیاتی آفات کے مشکل وقت میں پاکستان کی ہمدردی اور عملی مدد کی۔ پاکستان کے اسٹریٹجک محل وقوع کی اہمیت کو اجاگر کرتے ہوئے صدر نے کہا کہ پاکستان ایشیا کے سنگم پر واقع ہے اور تجارتی راستوں، توانائی کی راہداریوں اور علاقائی منڈیوں کو آپس میں ملاتا ہے۔
