اسلام آباد میں وزیر امور کشمیر و گلگت بلتستان اور سیفران امیر مقام کی زیر صدارت اجلاس ہوا جس میں آزاد جموں و کشمیر ایکشن کمیٹی کے ساتھ کیے گئے معاہدے پر عملدرآمد کی پیش رفت کا جائزہ لیا گیا۔ امیر مقام نے متعلقہ وفاقی وزارتوں اور محکموں کو معاہدے پر مکمل اور فوری عمل درآمد کو یقینی بنانے کی ہدایت کی۔ انہوں نے کہا کہ وزیراعظم محمد شہباز شریف نے واضح ہدایات جاری کی ہیں اور وہ ذاتی طور پر معاہدے پر عملدرآمد کی پیش رفت کی نگرانی کر رہے ہیں۔
گلگت بلتستان کے الیکشن کمیشن نے آئندہ سال 24 جنوری کو خطے میں عام انتخابات کے لیے پولنگ کا دن تجویز کیا ہے۔ الیکشن کمیشن کی جانب سے جاری پریس ریلیز کے مطابق صدر مملکت کو منظوری کے لیے باضابطہ خط ارسال کر دیا گیا ہے۔
وزیر اطلاعات و نشریات عطا اللہ تارڑ کا کہنا ہے کہ پاکستان تحریک انصاف کی خیبرپختونخوا حکومت ٹک ٹاک کی سیاست کر رہی ہے اور لائکس اور مقبولیت کے لیے سوشل میڈیا کے حربے استعمال کر رہی ہے۔ وہ آج نوشہرہ میں مسلم لیگ ن کے رہنمااختیار ولی خان سے ان کی والدہ کے انتقال پر تعزیت کے بعد میڈیا سے گفتگو کر رہے تھے۔
عطا اللہ تارڑ نے کہا کہ وزیر اعلیٰ کا کام عوام کی خدمت کرنا ہے۔ تاہم، انہوں نے کہا کہ خیبرپختونخوا کے وزیر اعلیٰ جیل میں اپنی پارٹی کے بانی سے ملاقات کے غیر قانونی مطالبے کے لیے دھرنا دے کر وقت ضائع کر رہے ہیں۔ انہوں نے کہا کہ پی ٹی آئی کے بانی میگا کرپشن کیس میں جیل میں ہیں اور ان کا جرم ثابت ہو چکا ہے۔ ایک سوال کے جواب میں عطا اللہ تارڑ نے کہا کہ پی ٹی آئی رہنما سیاسی قیدی نہیں ہیں۔ اس کے باوجود انہیں جیل میں وہ تمام سہولیات فراہم کی جا رہی ہیں جو کسی سیاسی رہنما کو حاصل نہیں تھیں۔ وفاقی وزیر نے کہا کہ اس حوالے سے پی ٹی آئی رہنماؤں کا جھوٹا پروپیگنڈہ بند ہونا چاہیے کیونکہ پاکستان مخالف بیانیہ کسی کے مفاد میں نہیں ہے۔
