پاکستان اور تاجکستان نے موجودہ ملٹری ٹو ملٹری تعاون کو بڑھانے کے عزم کا اظہار کیا ہے، بالخصوص تربیت، انسداد دہشت گردی اور علاقائی سلامتی کے شعبوں میں۔ یہ مفاہمت چیف آف آرمی سٹاف فیلڈ مارشل سید عاصم منیر اور تاجکستان کے وزیر دفاع کرنل جنرل سوبیر زودا امام علی عبدالرحیم کے درمیان جنرل ہیڈ کوارٹرز راولپنڈی میں ملاقات کے دوران طے پائی۔
ملاقات میں باہمی دلچسپی کے امور، علاقائی سلامتی اور دوطرفہ دفاعی تعاون پر تبادلہ خیال کیا گیا۔ معزز مہمان نے پاک فوج کی پیشہ وارانہ مہارت کو سراہا اور علاقائی استحکام اور امن کے فروغ میں اس کے کردار کا اعتراف کیا۔ آرمی چیف نے علاقائی استحکام اور خوشحالی کے لیے اجتماعی کوششوں کی اہمیت پر زور دیتے ہوئے تاجکستان کے ساتھ دفاعی اور سیکیورٹی تعلقات کو مضبوط بنانے کے لیے پاکستان کے عزم کا اعادہ کیا۔
سینیٹ نے آج پاکستان آرمی ترمیمی بل 2025، پاکستان ایئر فورس ترمیمی بل 2025، پاکستان نیوی ترمیمی بل 2025 اور سپریم کورٹ پریکٹس اینڈ پروسیجر ترمیمی بل 2025 منظور کر لیا۔ نائب وزیراعظم اسحاق ڈار نے پاکستان آرمی ترمیمی بل 2025 اور پاکستان ایئر فورس ترمیمی بل 2025 سینیٹ میں پیش کیا جب کہ وزیر دفاع خواجہ محمد آصف نے پاکستان نیوی ترمیمی بل 2025 ایوان میں پیش کیا۔
وزیر پارلیمانی امور طارق فضل چوہدری نے سپریم کورٹ پریکٹس اینڈ پروسیجر ترمیمی بل 2025 ایوان میں پیش کیا۔ دریں اثناء سینیٹ کو بتایا گیا کہ موجودہ حکومت نے تجارتی تنازعات کے حل کے لیے ایک موثر اور شفاف طریقہ کار فراہم کرنے کے لیے 'تجارتی تنازعات حل کمیشن' قائم کیا ہے۔
وزیر تجارت جام کمال خان نے وقفہ سوالات کے دوران ایوان کو بتایا کہ کمیشن کے موثر کام کو یقینی بنانے کے لیے متنوع پس منظر کے اہل پیشہ ور افراد کو تعینات کیا گیا ہے۔ وزیر مملکت برائے خزانہ بلال اظہر کیانی نے ایوان کو بتایا کہ حکومت ٹیکس کی بنیاد کو وسیع کرنے پر توجہ دے رہی ہے۔ انہوں نے کہا کہ ہماری کوشش ہے کہ ٹیکس کا مساوی نظام ہو اور تمام شعبے اپنا حصہ ڈالیں۔ ایوان کو ملتوی کر دیا گیا ہے۔
