چیف آف آرمی سٹاف فیلڈ مارشل سید عاصم منیر نے سیالکوٹ، شکر گڑھ، نارووال اور کرتارپور سمیت پنجاب کے سیلاب سے متاثرہ علاقوں کا دورہ کیا۔ سکھ برادری سے خطاب کرتے ہوئے فیلڈ مارشل عاصم منیر نے ان کی تمام عبادت گاہوں کی جلد بحالی کی یقین دہانی کرائی۔ سکھ برادری نے سیلاب سے متاثرہ دربار صاحب کرتارپور میں بروقت امدادی کارروائیوں پر فیلڈ مارشل کو خراج تحسین پیش کیا۔
سکھ برادری
نے فیلڈ مارشل عاصم منیر کے کرتارپور کے دورے اور فوری امدادی کارروائیوں کو
سراہا۔ سکھ رہنما رمیش سنگھ اروڑہ نے سیلاب کے دوران بروقت امدادی کارروائیوں
پر فیلڈ مارشل عاصم منیر کا شکریہ ادا کیا۔ انہوں نے کہا کہ پاکستان ہماری سرزمین
اور ہماری جان ہے۔ انہوں نے کہا کہ پاکستان اور سکھوں کا رشتہ ہمیشہ مضبوط اور
لازوال رہے گا۔ رمیش سنگھ اروڑہ نے کہا کہ دنیا بھر کے سکھ کہتے ہیں کہ پاکستان
اقلیتوں کے لیے سب سے محفوظ ملک ہے۔ دیگر سکھ رہنماؤں نے کہا کہ وہ فیلڈ مارشل
عاصم منیر کی جانب سے سکھ برادری کے لیے جو احترام ظاہر کرتے ہیں اس کے لیے وہ تہہ
دل سے مشکور ہیں۔ انہوں نے کہا کہ دنیا بھر کے سکھوں کی محبت اور ہمدردیاں پاکستان
کے ساتھ ہیں۔
جھنگ، فیصل
آباد، چنیوٹ اور ٹوبہ ٹیک سنگھ میں پاک فوج کی امدادی کارروائیاں جاری ہیں۔ آبادی
کے تحفظ کے لیے پاک فوج نے جھنگ اور فیصل آباد میں تین مقامات پر پشتوں کو توڑا۔
پشتہ ٹوٹنے کے بعد ایک لاکھ سے ایک لاکھ پچاس ہزار کیوسک پانی کا بہاؤ نیچے کی طرف
موڑ دیا گیا ہے۔ فوج کے جوان سیلاب سے متاثرہ افراد کو ہیلی کاپٹروں اور کشتیوں کے
ذریعے محفوظ مقامات پر منتقل کر رہے ہیں۔ تحصیل تاندلیانوالہ میں سیلاب زدگان کے
لیے پانچ ریلیف کیمپ، اٹھارہ میڈیکل کیمپ اور چھ ریسکیو کیمپ قائم کیے گئے ہیں۔
فوج امدادی کیمپوں میں سیلاب زدگان کو ضروری طبی امداد اور مفت ادویات فراہم کر
رہی ہے۔
وزیر اعظم
شہباز شریف کی ہدایت پر نیشنل ڈیزاسٹر مینجمنٹ اتھارٹی سیلاب سے متاثرہ علاقوں میں
امداد اور بچاؤ کے کاموں میں مدد فراہم کر رہی ہے۔ این ڈی ایم اے نے سیالکوٹ اور
نارووال کے سیلاب زدہ علاقوں کو 500 راشن بیگ فراہم کیے ہیں۔ راشن کے ہر
تھیلے کا وزن چھیالیس کلو گرام ہے اور اس میں بائیس ضروری اشیاء ہیں۔ امدادی سامان
متعلقہ ضلعی انتظامیہ کے ذریعے تقسیم کیا جائے گا۔ این ڈی ایم اے نے امدادی سامان
لے کر آٹھ ٹرکوں کا قافلہ سیالکوٹ اور نارووال کے لیے روانہ کیا۔ وزیرآباد، حافظ
آباد، چنیوٹ اور جھنگ کے لیے امدادی ٹرک آنے والے دنوں میں روانہ کیے جائیں گے۔
این ڈی ایم اے کا وزیر آباد میں پانچ سو، حافظ آباد میں پانچ سو، چنیوٹ میں ایک
ہزار اور جھنگ میں بارہ سو راشن پیک فراہم کرنے کا منصوبہ ہے۔ این ڈی ایم اے کی جانب
سے مجموعی طور پر 4,200 راشن بیگ پنجاب میں آفات سے متاثرہ علاقوں میں بھیجے جائیں
گے۔ یہ امدادی راشن پیک سیلاب سے متاثرہ خاندانوں کی فوری ضروریات کو پورا کرنے کے
لیے خصوصی طور پر تیار کیے گئے ہیں، اور ان میں کھانے پینے کی بنیادی اشیاء اور
دیگر ضروری اشیاء شامل ہیں۔
