پاکستان
نے پانچ بھارتی لڑاکا طیاروں کو کامیابی سے مار گرایا
وزیراعظم
شہباز شریف نے بھارتی جارحیت کا فیصلہ کن جواب دینے پر افواج پاکستان کو زبردست
خراج تحسین پیش کیا ہے۔ آج قومی اسمبلی میں اظہار خیال کرتے ہوئے انہوں نے کہا کہ
پاکستان نے خالصتاً روایتی جنگ کے ذریعے بھارت کو منہ توڑ جواب دیا۔ انہوں نے مادر
وطن کے دفاع میں ملک کی مسلح افواج کی اہلیت کا اعادہ کیا۔
وزیراعظم نے اس بات پر زور دیا کہ پاکستان اپنی
جغرافیائی سرحدوں کے دفاع کی پوری صلاحیت رکھتا ہے، چاہے وہ روایتی ہو یا جوہری
جنگ۔ وزیراعظم نے کہا کہ گزشتہ رات بھارت کے بزدلانہ حملے کا جواب پاکستان کے لیے
ایک عظیم فتح کی صورت میں نکلا، جو ملک کی مسلح افواج کی اعلیٰ سطح کی تیاری، پیشہ
ورانہ مہارت اور قربانی کے جذبے کی عکاسی کرتا ہے۔ انہوں نے کہا کہ پاک فوج، بحریہ
اور فضائیہ کے درمیان مکمل ہم آہنگی کے ذریعے پاکستان نے پانچ بھارتی لڑاکا طیاروں
کو کامیابی سے مار گرایا۔
پہلگام واقعے کے حوالے سے شہباز شریف نے پاکستان
کے واضح موقف کی تصدیق کی کہ اس کا اس معاملے میں کوئی دخل نہیں۔ انہوں نے یاد دلایا
کہ پاکستان نے اس معاملے کی تحقیقات کے لیے بین الاقوامی کمیشن کے قیام کی تجویز دی
تھی۔
وزیر
اعظم نے کہا کہ ہندوستان جعفر ایکسپریس پر دہشت گردانہ حملے میں ملوث ہونے سمیت
پاکستان میں دہشت گردی کو ہوا دے رہا ہے۔ انہوں نے نشاندہی کی کہ نئی دہلی کے
حکمرانوں نے جعفر ایکسپریس حملے کی مذمت کرنے کی زحمت تک نہیں کی۔ قومی اتحاد کی
اہمیت پر زور دیتے ہوئے شہباز شریف نے اپوزیشن اور تمام سیاسی جماعتوں پر زور دیا
کہ وہ ملک دشمنوں کو مضبوط پیغام دینے کے لیے اکٹھے ہوں۔ انہوں نے زور دے کر کہا
کہ اتحاد کے ذریعے پاکستان عظمت حاصل کر سکتا ہے۔
