پاکستان
اپنا دفاع کرنے کی صلاحیت رکھتا ہے
وزیر
اطلاعات و نشریات عطاء اللہ تارڑ اور ڈائریکٹر جنرل آئی ایس پی آر لیفٹیننٹ جنرل
احمد شریف آج (اتوار) تمام سیاسی جماعتوں کی اعلیٰ قیادت کو ملکی سلامتی کی موجودہ
صورتحال پر مشترکہ طور پر بریفنگ دیں گے۔ اعلیٰ سطحی پس منظر کی بریفنگ قومی سلامتی
کی موجودہ صورتحال پر توجہ مرکوز کرے گی، خاص طور پر پاک بھارت تعلقات اور حالیہ پیش
رفت کے مضمرات کے تناظر میں۔ شرکاء کو پاکستان کی مسلح افواج کی دفاعی تیاریوں،
جاری سفارتی کوششوں اور اہم امور پر ریاست کے باضابطہ موقف کے بارے میں بریفنگ دی
جائے گی۔
اقوام
متحدہ میں پاکستان کے مستقل نمائندے عاصم افتخار احمد کا کہنا ہے کہ پاکستان نہیں
چاہتا کہ خطے میں پہلے سے کشیدہ صورتحال بڑھے، لیکن اس میں کوئی شک نہیں ہونا چاہیے
کہ وہ کسی بھی جارحیت کے خلاف پوری طرح تیار، اور اپنا دفاع کرنے کی صلاحیت رکھتا
ہے۔
وہ نیویارک میں مقیم پاکستانی صحافیوں
کو علاقائی صورتحال اور اقوام متحدہ کے اعلیٰ عہدیداروں اور ممبر ممالک کو بھارتی
اقدامات کے نتیجے میں علاقائی امن و استحکام کو لاحق خطرات سے آگاہ کرنے کے لیے
پاکستانی مشن کی کوششوں کے بارے میں بریفنگ دے رہے تھے۔
سفیر
نے کہا کہ بھارت کی ڈس انفارمیشن مہم کا پردہ فاش کیا گیا ہے، اور ہمارے مشترکہ
دوست جو کشیدگی میں کمی کے لیے بھرپور کوششیں کر رہے ہیں، وہ اس بات سے بخوبی واقف
ہیں کہ کون نہیں چاہتا کہ کشیدگی میں کمی ہو۔ انہوں نے صحافیوں کو بتایا کہ انہوں
نے ایک ہفتے کے اندر اقوام متحدہ کے سیکرٹری جنرل اور اقوام متحدہ کی جنرل اسمبلی
کے صدر سے دو ملاقاتیں کیں جس میں انہیں پاکستان اور بھارت کے درمیان کشیدگی میں
اضافے کے خطرات سے آگاہ کیا۔ عاصم افتخار نے کہا کہ انہوں نے نیویارک میں او آئی سی
گروپ کے سفیروں سے بھی بات کی اور علاقائی صورتحال کی سنگینی سے آگاہ کیا۔ انہوں نے کہا کہ مناسب وقت پر اقوام متحدہ کی
سلامتی کونسل کا اجلاس بلانے سمیت تمام آپشنز میز پر ہیں۔ انہوں نے بتایا کہ انہوں
نے اقوام متحدہ کی سلامتی کونسل کے ارکان کو اعتماد میں لیا ہے۔
سفیر
نے کہا کہ پاکستان ایک ذمہ دار ریاست کے طور پر کام کر رہا ہے اور اس نے پہلگام
واقعے کی تیسرے فریق سے غیر جانبدار، قابل اعتماد اور شفاف تحقیقات کا مطالبہ کیا
ہے۔ انہوں نے کہا کہ پاکستان بحران کو کم کرنے میں اقوام متحدہ کے سیکرٹری جنرل کی
مداخلت کا خیر مقدم کرے گا۔
انہوں نے کہا کہ وہ پاکستان کی حمایت کے اظہار اور اقوام متحدہ کی سلامتی
کونسل کی قرارداد کے مطابق کشمیریوں کے حق خودارادیت کو برقرار رکھنے پر او آئی سی
کے شکر گزار ہیں۔
