کم آمدنی والے افراد کے لیے 50 روپے فی لیٹر پیٹرولیم ریلیف پیکج کا اعلان
حکومت نے ملک کے کم آمدنی والے افراد کے لیے 50 روپے فی لیٹر پیٹرولیم
ریلیف پیکج کا اعلان کیا ہے۔
یہ فیصلہ اتوار کو لاہور میں وزیراعظم محمد شہباز شریف کی زیر صدارت اجلاس
میں کیا گیا۔
وزیراعظم نے کہا کہ چھوٹی گاڑیاں استعمال کرنے والے صارفین بشمول موٹرسائیکل،
رکشہ اور 800 سی سی گاڑیاں پٹرولیم سبسڈی میں شامل کی جائیں۔
انہوں نے تمام متعلقہ حکام کو ہدایت کی کہ وہ سبسڈی کے موثر نفاذ کے لیے
جلد از جلد ایک اسکیم کو حتمی شکل دیں۔
شہباز شریف نے کہا کہ موٹرسائیکل، رکشہ اور چھوٹی گاڑیاں کم آمدنی والے
لوگ استعمال کرتے ہیں، اس لیے پیٹرولیم سبسڈی براہ راست غریب عوام کو ریلیف کا باعث
بنے گی۔
انہوں نے کہا کہ شدید معاشی مشکلات کے باوجود حکومت غریب لوگوں کی ہر
ممکن مدد کرنے کی کوشش کر رہی ہے۔
وزیر مملکت برائے پیٹرولیم مصدق ملک نے اجلاس کو کم آمدنی والے افراد
کو پیٹرولیم سبسڈی کے نفاذ کی حکمت عملی سے آگاہ کیا۔
جبکہ دوسری جانب وزیر اعظم شہباز شریف نے پاکستان
سپر لیگ (پی ایس ایل) کے آٹھویں ایڈیشن کے کامیابی سے انعقاد پر چیئرمین پاکستان کرکٹ
بورڈ (پی سی بی)، سندھ، پنجاب کے وزرائے اعلیٰ، صوبائی انتظامیہ اور پولیس کو سراہا۔
اتوار کو ایک
ٹویٹ میں انہوں نے کہا کہ شائقین نے اپنی توانائی اور جوش سے ایونٹ کو متحرک رکھا۔
