سندھ میں میدان سیاست آج سرگرم ہے، کراچی اور حیدرآباد میں آج پاور شو کیا،

 سندھ میں میدان سیاست آج سرگرم ہے، کراچی اور حیدرآباد میں آج پاور شو کیا، پیپلز پارٹی شہر قائد میں ریلی نکالی گئی، ایم کیو ایم حیدرآباد میں طاقت کا مظاہرہ کیا

پاکستان پیپلز پارٹی کراچی ڈویژن کے تحت آج کراچی میں یکجہتی ریلی نکالی گئی، پیپلزپارٹی کراچی ڈویژن کے صدر اور وزیر تعلیم سندھ سعید غنی کہتے ہیں پیپلزپارٹی کراچی میں لسانی سیاست کی سازش کو ناکام بنائے گی، ریلی آج دوپہر دو بجے عائشہ منزل ڈسٹرکٹ سینٹرل سے نکالی گئی جو لیاقت آباد، تین ہٹی، گرومندر، پیپلز سیکرٹریٹ، لائنز ایریا سے ہوتی ہوئی ایمپریس مارکیٹ صدر پر اختتام پذیر ہوئی۔ ان کا کہنا تھا کہ ریلی کا مقصد سندھ میں رہنے والی تمام قومیتوں اور زبانیں بولنے والوں کےخلاف سازشوں کو ناکام بنانا ہے۔ سندھ میں رہنے والے تمام سندھی ہیں، چاہے وہ کسی بھی قومیت، زبان یا ملک کے کسی بھی حصے سے یہاں آباد ہوئے ہوں۔ سعید غنی نے ریلی کے شرکا سے کورونا وائرس کے تناظرمیں ایس او پیز پر عملدرآمد کرنے کی اپیل بھی کی۔

ایم کیو ایم پاکستان کی جانب سے آج سہ پہر حیدرآباد مارچ کا انعقاد کیا جارہا ہے جس سے ایم کیو ایم پاکستان کے مرکزی اور مقامی رہنما خطاب کریں گے۔ حیدر آباد مارچ کا آغاز آج سہ پہر سٹی گیٹ سے کیا جائے گا۔ مارچ کے شرکا جیل روڈ، لبرٹی چوک، تلک چاڑی سے سٹیشن روڈ کے راستے مارچ کرتے ہوئے زنانہ ہسپتال پہنچیں گے۔ حیدرآباد مارچ کی تیاریاں جاری ہیں، حیدرآباد مارچ کے حوالے سے شہر بھر میں استقبالیہ کیمپ لگائے گئے ہیں جہاں ایم کیو ایم پاکستان کے رہنما اور کارکنان پارٹی ترانوں کی دھنوں پر رقص کر رہے ہیں۔

دوسری طرف ایم کیو ایم پاکستان کی جانب سے رات گئے حیدرآباد مارچ کے حوالے سے نوجوانوں کا اجلاس ہوا جس میں نوجوانوں کی بڑی تعداد نے شرکت کی، اجلاس سے ایم کیو ایم پاکستان کے مرکزی رہنما سابق مئیر وسیم اختر نے خطاب کیا۔