سعودی مسلح افواج کے چیف آف جنرل اسٹاف جنرل فیاض بن حمید الرویلی نے پیر کو راولپنڈی میں آرمی چیف فیلڈ مارشل سید عاصم منیر سے ملاقات کی۔ ملاقات کے دوران دونوں رہنماؤں نے پاکستان اور سعودی عرب کے درمیان دیرینہ اور اسٹریٹجک فوجی تعاون کو مضبوط بنانے پر خصوصی توجہ مرکوز کرتے ہوئے باہمی دلچسپی کے امور پر تبادلہ خیال کیا۔
انہوں نے دفاعی تعاون، سیکورٹی تعاون، اور انسداد دہشت گردی کی کوششوں کو مزید بڑھانے کی اہمیت پر زور دیا، جو گہرے دو طرفہ تعلقات کے ستون ہیں۔ معزز مہمان نے سعودی مسلح افواج کے ساتھ متعدد شعبوں میں پاکستان کے تعاون کو سراہا اور تعاون کے مضبوط رشتوں کو مزید آگے بڑھانے کے عزم کا اعادہ کیا۔ جی ایچ کیو پہنچنے پر جنرل فیاض بن حمید الرویلی نے یادگار شہدا پر پھولوں کی چادر چڑھائی اور پاک فوج کے چاق و چوبند دستے نے انہیں گارڈ آف آنر پیش کیا۔
وزیراعظم محمد شہباز شریف نے سعودی عرب کے ساتھ دفاع، سلامتی اور اقتصادی تعاون سمیت تمام شعبوں میں برادرانہ تعلقات کو مزید مضبوط بنانے کے پاکستان کے عزم کا اعادہ کیا ہے۔ وہ سعودی عرب کی مسلح افواج کے چیف آف جنرل سٹاف جنرل فیاض بن حمید الرویلی سے گفتگو کر رہے تھے جنہوں نے اسلام آباد میں ان سے ملاقات کی۔
وزیراعظم نے جنرل الرویلی کا خیرمقدم کیا اور سعودی عرب کی جانب سے پاکستان کو ہر وقت فراہم کی جانے والی غیر متزلزل حمایت اور یکجہتی پر پاکستان کی گہری تعریف کی۔ انہوں نے اس بات پر زور دیا کہ پاکستان اور سعودی عرب کے درمیان تعلقات کی جڑیں مشترکہ ایمان، مشترکہ اقدار اور باہمی اعتماد پر مبنی ہیں۔
ریاض کے اپنے حالیہ انتہائی کامیاب دوروں کو یاد کرتے ہوئے، وزیراعظم نے کہا کہ پاکستان دوطرفہ دفاعی تعاون کو مزید گہرا کرنے کے لیے پرعزم ہے، جس میں مشترکہ تربیت، مشقیں اور مہارت کے تبادلے شامل ہیں۔ وزیراعظم نے دہشت گردی اور انتہا پسندی کی تمام شکلوں اور مظاہر میں مقابلہ کرنے اور خطے میں امن و استحکام کو فروغ دینے کے لیے دونوں ممالک کے مشترکہ عزم کو بھی اجاگر کیا۔
جنرل الرویلی نے سعودی قیادت کی جانب سے وزیراعظم اور پاکستانی عوام کوخیرسگالی کا پیغام پہنچایا۔ انہوں نے پاکستان کے ساتھ موجودہ بہترین دفاعی اور تزویراتی شراکت داری کو نئی بلندیوں تک پہنچانے کے لیے مملکت کی مضبوط خواہش کا اعادہ کیا۔
